Eurodac: Bunachar sonraí tearmainn agus imirce an Aontais

An chaoi ar nuashonraíodh Eurodac

Rinneadh an Bunachar Sonraí Dachtalascópachta Eorpach (Eurodac), bunachar sonraí tearmainn agus imirce an Aontais, a nuachóiriú faoin gcomhshocrú imirce agus tearmainn chun tacú le bainistiú tearmainn agus imirce níos éifeachtaí ar fud an Aontais.

Ó tháinig Eurodac i bhfeidhm in 2003, chuidigh sé le tíortha an Aontais iarrthóirí tearmainn a shainaithint agus freagracht a chinneadh as scrúdú a dhéanamh ar iarratais ar chosaint idirnáisiúnta faoin rud ar a dtugtaí 'córas Bhaile Átha Cliath'.

Roimhe seo, stóráil Eurodac méarloirg na n-iarratasóirí tearmainn agus na n-imirceach neamhrialta a cláraíodh i mBallstáit an Aontais den chuid is mó. Chuidigh sé leis na húdaráis daoine aonair a shainaithint, a fháil amach an ndearna duine iarratas ar thearmann roimhe sin i mBallstát eile agus an fhreagracht as scrúdú a dhéanamh ar iarratais ar thearmann a chinneadh.

Téann an Eurodac nuashonraithe níos faide ná sonraí méarlorg trí fhaisnéis bhithmhéadrach agus chéannachta níos cuimsithí a bhailiú maidir le catagóirí éagsúla imirceach. Fágann sé sin gur féidir sainaithint níos cruinne a chinntiú, tacú le rialacha tearmainn agus imirce a chur chun feidhme, cuidiú le haghaidh a thabhairt ar imirce neamhrialta agus ar ghluaiseachtaí neamhúdaraithe laistigh den Aontas agus sonraí níos fearr a chur ar fáil chun bonn eolais a chur faoi cheapadh beartas.

Príomhghnéithe Eurodac nuashonraithe

Tháinig Eurodac nuachóirithe i bhfeidhm an 12 Meitheamh 2026. Tugtar isteach leis raon gnéithe nua atá ceaptha chun feabhas a chur ar shainaithint, chun tacú le bainistiú tearmainn agus imirce agus chun cabhrú le haghaidh a thabhairt ar ghluaiseachtaí neamhrialta laistigh den Aontas.

Áirítear ar na feabhsuithe sin bailiú sonraí bithmhéadracha agus céannachta, raon feidhme leathnaithe catagóirí agus bearta slándála neartaithe agus socruithe stórála sonraí, agus coimircí láidre cosanta sonraí mar thaca leo.

Beidh feidhm ag na forálacha a bhaineann le tairbhithe de chosaint shealadach ón 12 Meitheamh 2029.

Pearsantú:

iarrthóirí tearmainn aonair a chlárú, in ionad iarratas a dhéanamh

sonraí bithmhéadracha breise, ar nós íomhánna den aghaidh agus sonraí pearsanta, mar shampla ainm, dáta breithe, náisiúntacht, cóip de dhoiciméid chéannachta agus dáta an iarratais, a bhailiú

Bailiú éigeantach sonraí bithmhéadracha i gcás daoine atá 6 bliana d’aois ar a laghad

Raon feidhme na gcatagóirí:

daoine a dhéanann iarratas ar chosaint idirnáisiúnta

daoine a athlonnaítear faoi scéimeanna athlonnaithe de chuid an Aontais nó scéimeanna athlonnaithe náisiúnta

daoine a gabhadh i dtaca le trasnú mírialta teorann seachtraí de chuid an Aontais, chomh maith le daoine a díbhordáladh tar éis oibríochtaí cuardaigh agus tarrthála

daoine a bhfuarthas amach go raibh siad ag fanacht go neamhdhleathach ar chríoch Ballstáit

tairbhithe cosanta sealadaí (cé nach ndéanfaí a gcuid sonraí a stóráil ach ar feadh thréimhse an stádais sin)

Gnéithe slándála:

in imthosca atá sainithe go soiléir, beidh na Ballstáit in ann a thaifeadadh go bhféadfadh náisiúnach tríú tír a bheith ina bhagairt slándála, agus go bhféadfaí an bhratach slándála sin a bhaint i gcomhairle le Ballstáit eile

déanfar an rochtain a shimpliú do na húdaráis forfheidhmithe dlí

Sonraí a stóráil:

tréimhsí stórála éagsúla le haghaidh catagóirí éagsúla daoine aonair

déanfar sonraí a bhaineann le hiarratasóirí ar chosaint idirnáisiúnta a stóráil ar feadh 10 mbliana

déanfar sonraí a bhaineann le daoine a ligtear isteach faoi scéimeanna athlonnaithe agus le daoine a fuarthas ag teacht isteach go neamhrialta nó ag fanacht go neamhdhleathach san Aontas a stóráil ar feadh 5 bliana

Idir-inoibritheacht le córais eile TF

Ó cheann ceann an Aontais, tá faisnéis á roinnt le chéile ag na húdaráis ar chórais mhórscála TF ar mhaithe le cosaint na saoránach agus comhrac na coiriúlachta, agus teorainneacha slána a bheith againn.

Chomh maith le bunachar sonraí Eurodac, tá córais TF eile ann a chuidíonn le teorainneacha an Aontais a dhaingniú, lena n-áirítear:

• Córas Faisnéise Schengen (CFS)
• an Córas Faisnéise Víosaí (VIS)
• an Córas Dul Isteach/Imeachta (EES)

Go gairid, cuirfear dhá chóras mórscála TF eile chun feidhme, eadhon:

• an Córas Faisnéise Eorpach um Thaifead Coiriúil le haghaidh náisiúnaigh tríú tír (ECRIS-TCN)
• Córas an Aontais Eorpaigh um Fhaisnéis agus Údarú Taistil (ETIAS)